திருப்பூர், மார்ச் 9: தமிழக சட்டமன்ற தேர்தல் ஒரே கட்டமாக அடுத்த மாதம் 6-ம் தேதி நடைபெறுகிறது. இதையொட்டி திருப்பூர் மாவட்ட நிர்வாகம் சார்பில் தேர்தலுக்கான ஏற்பாடுகள் தீவிரமாக நடைபெற்று வருகிறது. 100 சதவீதம் வாக்களிப்பதன் அவசியம் குறித்து பல்வேறு விழிப்புணர்வு நிகழ்ச்சிகளும் நடத்தப்பட்டு வருகிறது. இதன் ஒருபகுதியாக திருப்பூர் வடக்கு சட்டமன்ற தொகுதியில் வாக்காளர்களுக்கு தேர்தல் தொடர்பான விழிப்புணர்வை ஏற்படுத்தும் வகையில் விழிப்புணர்வு ஊர்வலம் நேற்று காலை நடைபெற்றது. திருப்பூர் 15 வேலம்பாளையம் அரசு நடுநிலைப்பள்ளியில் தொடங்கிய இந்த ஊர்வலத்தை மாவட்ட வருவாய் அலுவலர் சரவணமூர்த்தி கொடியசைத்து தொடங்கி வைத்தார். இந்த ஊர்வலம் அனுப்பர்பாளையம்புதூர், அவினாசி ரோடு உள்ளிட்ட முக்கிய பகுதிகள் வழியாக சென்று அனுப்பர்பாளையத்தில் உள்ள மாநகராட்சி 1-வது மண்டல அலுவலகத்தில் நிறைவடைந்தது.