உளுந்தூர்பேட்டை, மார்ச் 3: ஊழலில் தான் தமிழகம் முதலிடத்தில் உள்ளது என்று மார்க்சிஸ்ட் கம்யூனிஸ்ட் மாநில செயலாளர் பாலகிருஷ்ணன் தெரிவித்தார். கள்ளக்குறிச்சி மாவட்டம் உளுந்தூர்பேட்டை மணிக்கூண்டு திடலில் மார்க்சிஸ்ட் கம்யூனிஸ்ட் கட்சியின் சார்பில் தேர்தல் பிரசார விளக்க பொதுக்கூட்டம் மற்றும் தேர்தல் நிதியளிப்பு கூட்டம் நடைபெற்றது. மாவட்ட செயலாளர் ஏழுமலை தலைமை தாங்கினார். நகர செயலாளர் தங்கராசு, ஒன்றிய செயலாளர்கள் சீனுவாசன், ஜெயக்குமார், மோகன் ஆகியோர் முன்னிலை வகித்தனர். மாநில குழு உறுப்பினர்கள் வெங்கட்ராமன், ஆனந்தன் ஆகியோர் துவக்க உரையாற்றினார்கள். மாநில செயலாளர் பாலகிருஷ்ணன் பேசுகையில், மோடியும், அமித்ஷாவும் சினிமாவில் நடிக்க வரவில்லை. இவர்கள் சினிமாவிற்கு வந்து இருந்தால் சிவாஜி, அமிதாப்பச்சனையே மிஞ்சி இருப்பார்கள். மிக சிறந்த தமிழ்மொழியை படிக்க வில்லை என பிரதமர் மோடி வருத்தப்படுகிறார். அவரது ஆட்சியில் அமைச்சர்கள் இந்தியில் தானே கடிதம் எழுதுகின்றனர். தமிழகத்திற்கு வந்தால் விவசாயிகளை பற்றி பெருமையாக பேசும் பிரதமர் மோடி டெல்லியில் 110 நாளாக போராடி வருகிறார்களே, 200க்கும் மேற்பட்டவர்கள் உயிரிழந்த இடத்திற்கு சென்று பேச வேண்டியது தானே?