சேலம்: சேலம் அரசு போக்குவரத்து கழகத்தில் தவெக தொழிற்சங்கம் தொடங்குவதாக தொழிலாளர்களிடம் மாஜி அதிமுக நிர்வாகி வசூல் வேட்டையில் ஈடுபட்டுள்ளதாக குற்றச்சாட்டு எழுந்துள்ளது. தமிழ்நாடு அரசு போக்குவரத்து கழகத்தில் திமுக, அதிமுக, இந்திய கம்யூனிஸ்ட், மார்க்சிஸ்ட் கம்யூனிஸ்ட், காங்கிரஸ், பாஜ, பாமக, விசிக உள்ளிட்ட அரசியல் கட்சிகளுக்கு தொழிற்சங்கங்கள் உள்ளன. அரசு பஸ் டிரைவர்கள், கண்டக்டர்கள், தொழில்நுட்ப பணியாளர்கள் உள்ளிட்ட அனைத்து தொழிலாளர்களும் இந்த தொழிற்சங்கங்களில் உள்ளனர். எந்த கட்சி ஆட்சியில் இருக்கிறதோ, அந்த கட்சியின் தொழிற்சங்கத்தினர் அரசுக்கு ஆதரவாக ஸ்டிரைக் காலங்களில் களத்தில் நிற்கின்றனர். பொதுமக்கள் பாதிக்கப்படாத வகையில், சீரான பஸ் போக்குவரத்திற்கு வழிவகை செய்கின்றனர்.

இந்நிலையில் தற்போது தமிழ்நாட்டில் தமிழக வெற்றிக்கழகம் அதிக இடங்களில் வெற்றி பெற்றுள்ளது. இந்த தவெகவிற்கு அரசு போக்குவரத்து கழகத்தில் தொழிற்சங்கம் இல்லை. அந்த தவெக தொழிற்சங்கத்தை ஏற்படுத்த கட்சி நிர்வாகிகள் ஏற்பாடுகளை செய்து வருகின்றனர். சேலம் அரசு போக்குவரத்து கழகத்தில் இதற்கான வேலையில், ஏற்கனவே அதிமுக தொழிற்சங்கத்தில் இருந்து சமீபத்தில் வெளியேறி தவெகவில் இணைந்த மாஜி நிர்வாகி ஈடுபட்டுள்ளார்.

அதிமுக தொழிற்சங்கத்தில் முக்கிய பொறுப்பில் இருந்த அவர் மீது பல்வேறு முறைகேடு குற்றச்சாட்டுகள் வந்தன. மேலும், விஜிலென்ஸ் வழக்கும் பாய்ந்தது. இந்த சூழலில், முன்னாள் அமைச்சர் செங்கேட்டையன் மூலம் தவெகவில் இணைந்துக் கொண்டார். அவர் தற்போது, சேலம் அரசு போக்குவரத்து கழகத்தில் பணியாற்றி வரும் டிரைவர், கண்டக்டர், இதர தொழிலாளர்களை கொண்டு புதிய தவெக தொழிற்சங்கத்தை துவங்க பலரிடமும் பேசி வருவதாக கூறப்படுகிறது. இதில், பெரும்பாலான தொழிலாளர்களிடம், அடுத்த ஆட்சி தங்களுடையது எனக்கூறி வசூல்வேட்டையில் ஈடுபட்டுள்ளதாக குற்றச்சாட்டு எழுந்துள்ளது.

இதுபற்றி போக்குவரத்து கழக தொழிலாளர்கள் கூறுகையில், “தமிழ்நாட்டில் முதல் தவெக தொழிற்சங்கத்தை சேலத்தில் தொடங்க இருப்பதாக கூறி, மாஜி அதிமுக நிர்வாகி வசூல் வேட்டை நடத்தி வருகிறார். இவர் மீது நாங்கள் ஏற்கனவே நிர்வாகத்திடம் புகார் கொடுத்தோம். தற்போதும், அதே முறைகேட்டில் ஈடுபடும் செயலில் இறங்கியுள்ளார். இதனால், தவெக முக்கிய நிர்வாகிகள், அவரது செயல்பாட்டை தடுத்து, போக்குவரத்து தொழிலாளர்களை பாதுகாக்க வேண்டும்,’’ என்றனர்.