கொல்கத்தா: மேற்குவங்கத்தில் முதற்கட்ட தேர்தல் நடக்கும் 152 தொகுதிகளில் நேற்று மாலை 6 மணிக்கு பிரசாரம் ஓய்ந்தது. அங்கு நாளை காலை 7 மணிக்கு ஓட்டுப்பதிவு நடக்கிறது. மேற்குவங்க மாநிலத்தில் முதல்வர் மம்தா பானர்ஜி தலைமையிலான திரிணாமுல் காங்கிரஸ் கட்சி ஆட்சி நடக்கிறது. அங்கு இரண்டு கட்ட தேர்தல் தேதி அறிவிக்கப்பட்டுள்ளது. மொத்தம் உள்ள 294 தொகுதிகளில் முதற்கட்டமாக 152 தொகுதிகளில் ஏப்.23 அன்றும், இரண்டாம் கட்டமாக 142 தொகுதிகளில் ஏப்.29 அன்றும் தேர்தல் நடக்கிறது. மே 4 ஆம் தேதி ஓட்டு எண்ணிக்கை நடக்கிறது.
இந்த தேர்தலில் தொடர்ந்து 4வது முறையாக ஆட்சி அமைக்க முதல்வர் மம்தா தீவிரம் காட்டி வருகிறார். ஆனால் ஆட்சியை பிடிக்க பா.ஜவும் ஆர்வம் காட்டி வருகிறது. மேலும் மேற்குவங்க வாக்காளர் பட்டியலில் இருந்து எஸ்ஐஆர் பணி மூலம் 91 லட்சம் வாக்காளர்கள் நீக்கப்பட்ட பிறகு முதல் தேர்தல் நடப்பதால் பரபரப்பு ஏற்பட்டுள்ளது. முதற்கட்ட தேர்தல் நடக்கும் வட வங்காளம் மற்றும் மாநிலத்தின் தென் பகுதியில் உள்ள பல்வேறு மாவட்டங்களில் அமைந்துள்ள 152 தொகுதிகளில் நேற்று மாலை 6 மணிக்கு பிரசாரம் ஓய்ந்தது. இந்த 152 தொகுதிகளில் 3.60 கோடிக்கும் அதிகமான வாக்காளர்கள் உள்ளனர். இந்த தொகுதிகளில் பாதுகாப்புக்காக சுமார் 2.5 லட்சம் வீரர்களைக் கொண்ட துணை ராணுவப் படைகளின் 2,450 பிரிவுகளைத் தேர்தல் ஆணையம் களமிறக்கியுள்ளது.
மேலும் முதல் கட்டத் தேர்தல் நடைபெறும் பகுதிகளில் உள்ள 8,000-க்கும் மேற்பட்ட வாக்குச்சாவடிகள் ‘மிகவும் பதற்றமானவை’ என அடையாளம் காணப்பட்டுள்ளன. மால்டா, முர்ஷிதாபாத், உத்தர தினஜ்பூர், கூச் பெஹார், பீர்பூம் மற்றும் பர்த்வான் போன்ற சில மாவட்டங்களை ‘குறிப்பாகப் பதற்றமானவை’ எனத் தேர்தல் ஆணையம் சுட்டிக்காட்டியுள்ளது; இப்பகுதிகளில் உள்ள அனைத்துத் தொகுதிகளும் தீவிர கண்காணிப்பின் கீழ் கொண்டுவரப்பட்டுள்ளன.
எந்தவொரு அசம்பாவிதத்திற்கும் உடனடியாகப் பதிலளிக்கும் வகையில், கண்காணிப்புக் குழுக்கள் மற்றும் 2,193 விரைவுப் பதிலளிப்புக் குழுக்களின் துணையுடன், மத்திய ஆயுதக் காவல் படைகள் பெருமளவில் களத்தில் நிறுத்தப்பட்டுள்ளன.
* முக்கிய வேட்பாளர்கள்
மேற்குவங்கத்தில் முதற்கட்ட தேர்தலில் முக்கிய வேட்பாளர்களில் எதிர்க்கட்சித் தலைவர் சுவேந்து அதிகாரி (பாஜ, நந்திகிராம்), முன்னாள் ஒன்றிய அமைச்சர் நிசித் பிரமாணிக் (பாஜ, மதாபங்கா), அமைச்சர்கள் உதயன் குஹா (திரிணாமுல், தின்ஹாட்டா), கவுதம் தேப் (திரிணாமுல், சிலிகுரி) மற்றும் அதிர் ரஞ்சன் சௌத்ரி (காங்கிரஸ், பஹரம்பூர்) ஆகியோர் அடங்குவர்.
