பயணிகளிடம் சோதனை நடத்த சென்னை விமான நிலையத்தில் புதிய காமிரா அறிமுகம்: சுங்க அதிகாரிகள் சட்டையில் அணிந்து கண்காணிப்பார்கள்

மீனம்பாக்கம்: சென்னை உள்பட பல விமான நிலையங்களில் வெளிநாடுகளுக்கு புறப்பாடு, வருகை பயணிகளுக்கு சுங்க சோதனையின்போது பல குற்றச்சாட்டுகள் எழுந்து வருகிறது. இதையடுத்து, அனைத்து விமான நிலையங்களிலும் அதிகாரிகளின் சட்டை பாக்கெட்டுகளில் நவீன முறையில் வடிவமைக்கப்பட்ட ‘பாடி வார்ன் காமிரா’ அணிந்திருக்க வேண்டும், அவை, அதிகாரிகளின் சோதனைகளை வீடியோ மற்றும் ஆடியோவாக பதிவு செய்யும். அக்காட்சிகள் கம்ப்யூட்டர்களில் தேதி, நேரம் வாயிலாக குறிப்பிடப்பட்டு சேமித்து வைக்கப்பட்டிருக்கும்.

ஏதாவது பிரச்னை ஏற்பட்டதாக உயர் அதிகாரிகளுக்கு புகார்கள் அல்லது சந்தேகங்கள் வந்தால், இந்த ‘பாடி வார்ன் காமிரா’ பதிவுகளை ஆய்வு செய்ய வேண்டும் என்று சுங்கத்துறைக்கு ஒன்றிய நிதி அமைச்சகம் உத்தரவிட்டுள்ளது. இதைத் தொடர்ந்து, இந்த நவீன நடைமுறை பெங்களூரில் அமல்படுத்தப்பட்டது. 2வதாக நேற்று சென்னை விமானநிலையத்தில் அமல்படுத்தப்பட்டுள்ளது. இதையடுத்து ஐதராபாத், கொச்சி விமானநிலையங்களிலும் விரைவில் அமல்படுத்தப்பட உள்ளது. சென்னையில் முதல்கட்டமாக சுங்கத்துறை அதிகாரிகளுக்கு 8 பாடி வார்ன் காமிராக்களை ஒன்றிய நிதி அமைச்சகம் வழங்கியுள்ளது.

இவை போதுமானதாக இல்லை என்பதால், கூடுதலாக 24 காமிராக்கள் வர இருக்கின்றன. இதன்மூலம் சென்னை விமானநிலைய வருகை பகுதி சுங்க சோதனை பிரிவில், கிரீன் சேனல், ரெட் சேனல் என்று 2 வழிகளில் சுங்கத்துறை அதிகாரிகள், தங்களின் சட்டை பாக்கெட்டுகளில் ‘பாடி வார்ன் ’ எனும் நவீன காமிராக்களை அணிந்திருப்பர். இந்த காமிராவில் பயணிகளிடம் நடத்தப்படும் சோதனை உள்பட அனைத்தும் தேதி, நேரம் வாயிலாக வீடியோ மற்றும் ஆடியோவாக கம்ப்யூட்டர்களில் பதிவாகிவிடும். ஏதேனும் பிரச்னை ஏற்படும்போது, இக்காட்சிகளை சுங்கத்துறை உயரதிகாரிகள் முறைப்படி ஆய்வு செய்து முடிவு செய்வார்கள்.
கடந்த 2 ஆண்டுகளுக்கு முன் ஒரு பெண் பயணி, சுங்க சோதனையின்போது, தனது தாலியை கழற்றும்படி அதிகாரி கூறியதாக புகார் தெரிவித்தார். விசாரணையில், அதுபோன்று நடக்கவில்லை என தெரியவந்தது. இத்தகைய அவலநிலையை தடுக்க, புதிய திட்டத்தை ஒன்றிய நிதி அமைச்சகம் செயல்படுத்த தொடங்கியுள்ளது. இந்த திட்டம் திருச்சி, கோவை, மதுரை ஆகியவற்றில் படிப்படியாக விரிவுபடுத்தப்பட உள்ளது. ஏற்கனவே பல திட்டங்கள் அமல்படுத்தப்பட்டு மாயமாகி விடுகிறது. அதுபோன்று இல்லாமல் இந்த திட்டம் தொடர்ந்து செயல்பாட்டில் இருக்க வேண்டும் என்று சுங்கத்துறை அதிகாரிகளும் பயணிகளும் வலியுறுத்துகின்றனர்.