டெல்லி: கடும் பனிமூட்டம் காரணமாக டெல்லியில் இருந்து புறப்பட வேண்டிய 63 விமானங்கள் இன்று(20-12-2025 )ரத்து செய்யப்பட்டுள்ளது. மேலும் டெல்லி விமான நிலையத்துக்கு வர வேண்டிய 66 விமானங்களும் திருப்பி விடப்பட்டதாக விமான நிலைய நிர்வாகம் தகவல் தெரிவித்துள்ளது.
நேற்று(19-12-2025) வருகை மற்றும் புறப்பாடு உட்பட 22 டெல்லி விமானங்களை இண்டிகோ ரத்து செய்தது. மொத்தம் 82 விமானங்கள் எந்த காரணமும் இல்லாமல் ரத்து செய்யப்பட்டன. குறைந்த தெரிவுநிலை மற்றும் மூடுபனி காரணமாக ராஞ்சி, ஜம்மு மற்றும் ஹிண்டனில் விமான அட்டவணைகள் பாதிக்கப்படக்கூடும் என்று விமான நிறுவனங்கள் தெரிவித்துள்ளன.
இது தொடர்பாக அதிகாரிகள் கூறுகையில்;
கடந்த சில நாட்களாக வட இந்தியாவில் பனிமூட்டம் தொடர்ந்து பார்வைத்திறனைக் குறைப்பதால் பெரும் விமானப் போக்குவரத்து இடையூறுகள் ஏற்பட்டுள்ளன. சிவில் விமானப் போக்குவரத்து அமைச்சகம் (MoCA) ஒட்டுமொத்த சூழ்நிலையையும் கண்காணித்து வருகிறது, பயணிகளின் வசதியை உறுதிசெய்து, விமான நிறுவனங்கள் சீராக செயல்பட உதவுவதாக தெரிவித்தனர்.
காற்றின் தரம்:
இதற்கிடையில், சனிக்கிழமை காலை டெல்லியின் காற்றின் தரம் மோசமடைந்தது, காலை 8 மணிக்கு ஒட்டுமொத்த காற்றின் தரக் குறியீடு (AQI) 384 ஆக இருந்தது, இது ‘மிகவும் மோசமான’ பிரிவில் இடம்பிடித்துள்ளதாக மத்திய மாசு கட்டுப்பாட்டு வாரியம் (CPCB) தெரிவித்துள்ளது.
