திண்டுக்கல், ஜன. 20:கொரோனா பரவல் காரணமாக கடந்த மார்ச் 24ம் தேதி பள்ளி, கல்லூரிகள் மூடப்பட்டன. கொரோனா பரவல் குறைந்து வருவதை தொடர்ந்து தமிழக அரசு ஜன.19ம் தேதி முதல் 10, 12ம் வகுப்பு மாணவர்களுக்கு பள்ளிகளை திறக்க உத்தரவிட்டது. அதன்படி நேற்று திண்டுக்கல் மாவட்டத்தில் அரசு, அரசு உதவிபெறும், தனியார் பள்ளிகள் திறக்கப்பட்டன. திண்டுக்கல் கல்வி மாவட்டத்தில் 127 பள்ளிகள், பழநி கல்வி மாவட்டத்தில் 87 பள்ளிகள், வேடசந்தூர் கல்வி மாவட்டத்தில் 70 பள்ளிகள், வத்தலக்குண்டு கல்வி மாவட்டத்தில் 107 பள்ளிகள் என மொத்தம் 391 பள்ளிகள் திறக்கப்பட்டன. இதில் பத்தாம் பகுப்பில் 28, 619 மாணவ, மாணவிகளும், பன்னிரண்டாம் வகுப்பில் 22, 061 மாணவ, மாணவிகளும் பயின்று வருகின்றனர். முன்னதாக மாணவர்கள், ஆசிரியர்களுக்கு சானிடைசர் கைகளில் போட்டும், வெப்பமானியை கொண்டு சோதனை செய்த பின்னரே வகுப்பறைக்குள் அனுமதிக்கப்பட்டனர்.