சென்னை: நூற்றாண்டு காணும் லட்சுமி காந்தன் பாரதிக்கு வாழ்த்து தெரிவித்து முதல்வர் மு.க. ஸ்டாலின் நேற்று வெளியிட்டுள்ள சமூக வலைதளப் பதிவு: நூற்றாண்டு காணும் லட்சுமி காந்தன் பாரதி! அனைவருக்கும் எடுத்துக்காட்டான காந்திய வாழ்வு! விடுதலை போராட்ட வீரர் – மொழிப்போர் தீரர் நாவலர் சோமசுந்தர பாரதியார் பெயரன், விடுதலைப் போராட்ட தியாகிகள் கிருஷ்ணசாமி பாரதி, லட்சுமி பாரதி ஆகியோரின் மகன் என நாட்டுக்காக உழைத்த குடும்பத்தின் வழித்தோன்றலாக பிறந்து, 16 வயது மாணவராக விடுதலை போராட்டத்தில் தொடங்கி, மதுரை மாவட்ட ஆட்சியர், தலைவர் கலைஞரின் முதல் தனிச் செயலாளர் என பரந்த பெருவாழ்வுக்கு சொந்தக்காரரான அவரை வாழ்த்தி மகிழ்கிறேன்.
நாட்டுப்பற்றில் உறுதி, மக்கள் தொண்டில் நாட்டம், எளிமை என நானிலமும் போற்றும் நற்பண்புகளைக் கொண்ட திரு. லட்சுமி காந்தன் பாரதி அவர்களது வாழ்க்கையை, இன்றைய தலைமுறை தனக்கான பாடமாக கொள்ள வேண்டும். இவ்வாறு அவர் கூறியுள்ளார்.
