மானூர், ஜன. 29: மானூர் ஊராட்சி ஒன்றியம், 41 பஞ்சாயத்துகள் அடங்கிய பெரிய ஒன்றியமாகும். 3 ஆண்டுகளுக்கு மேல் இதன் நிர்வாகம், ஒன்றிய அதிகாரியின் நேரடி கண்காணிப்பில் உள்ளன. கிராம பஞ். வட்டார வளர்ச்சி அலுவலரின் கீழ் பல தனி அதிகாரிகள் நியமிக்கப்பட்டு பஞ். நிர்வாகம் செயலர்கள் மூலம் நிர்வகிக்கப்பட்டு வருகின்றன. இதனால் 41 ஊராட்சிகளிலும் உள்ள 100க்கும் மேற்பட்ட குக்கிராமங்களின் பல்வேறு குறைகள் நிவர்த்தி செய்ய இயலாமல் பரிதாப நிலையில் உள்ளன. இதனால் கிராமத்தினர் தங்கள் குறைகளை எங்கு சொல்வது என்று தெரியாமலும், ஊராட்சி செயலர்களிடம் கூறினாலும் நடைமுறைக்கு வராமலும் உள்ளதாக புலம்புகின்றனர். இந்த ஒன்றியத்திற்குட்பட்ட புதூர் ஊராட்சி திருவள்ளுவர் நகரில் 150க்கும் மேற்பட்ட குடியிருப்புகள் உள்ளன. 500க்கும் மேற்பட்டோர் வசித்து வருகின்றனர். இந்நகரில் எந்த அடிப்படை வசதியும் இல்லை எனக்கூறி நேற்று முன்தினம் 50க்கும் மேற்பட்டோர், ஒன்றிய அலுவலகத்துக்கு திரண்டு வந்து மனு அளித்தனர்.