புதுக்கோட்டை, அக்.11: விதை பரிசோதனை செய்வதன் மூலம் அதிக மகசூல் பெறலாம் என்று திருக்கோகர்ணம் விதை பரிசோதனை மையம் விவசாயிகளை கேட்டுக்கொண்டுள்ளது. புதுக்கோட்டை திருக்கோகர்ணம் பகுதியில் விதைப்பரிசோதனை நிலையம் இயங்கி வருகிறது. விதையின் தரத்தை அறிய விதைப்பரிசோதனை செய்யப்படுகிறது. இந்நிலையத்தில் விதை விவசாயிகள் மற்றும் விதை விற்பனையாளர்கள், விதை உற்பத்தியாளர்களிடம் இருந்து பெறப்படும் பணிவிதை மாதிரிகள் ஆய்வு செய்யப்பட்டு வருகிறது. விதைச்சட்டம் 1966 பிரிவு 7(பி)யின் படி ஒவ்வொரு பயிருக்கும் குறைந்தபட்ச முளைப்புத்திறன் தரம் நிர்ணயம் செய்து அறிவிக்கப்பட்டுள்ளது. நெற்பயிருக்கு 80 சதவீதம வீரிய மக்காச்சோளத்திற்கு 90 சதவீதம் உளுந்து, துவரை பாசிப்பயிறு வகைகளுக்கு 75 சதவீதம், நிலக்கடலைக்கு 70 சதவீதம் மற்றும் கம்பு, சோளம், கேழ்வரகு ஆகிய பயிருக்கு 75 சதவீதம் ஆகும். இந்த தரத்திற்கு குறைவான விதைகளை விதைத்தால் மகசூல் இழப்பு நேரிடும்.