டெல்லி: டெல்லியில் குடியுரிமை திருத்தச் சட்ட ஆதரவாளர்களுக்கும், எதிர்ப்பாளர்களுக்கும் இடையே நேற்று ஏற்பட்ட மோதலில் வன்முறை வெடித்தது. வடகிழக்கு டெல்லியின் யாஃபிராபாத், மஜ்பூர் மற்றும் பஜான்புரா பகுதிகளில் வன்முறை வெடித்தது. இந்த வன்முறையில், ஒரு தலைமைக்காவலர் உள்பட 7 பேர் பலியாகி உள்ளனர். 60-க்கும் மேற்பட்டோர் காயமடைந்து சிகிச்சை பெற்று வருகின்றனர். அங்கு பதற்றத்தை தணிக்க போலீஸ் குவிக்கப்பட்டு உள்ளது. சிறப்புப் பிரிவு, குற்றப்பிரிவு மற்றும் பொருளாதார குற்றப்பிரிவு பிரிவு (ஈ.ஓ.டபிள்யூ) அதிகாரிகளுடன் வடகிழக்கு டெல்லியில் 35 துணை ராணுவப் படைகள் நிறுத்தப்பட்டுள்ளன. டெல்லியின் பல்வேறு மாவட்டங்களைச் சேர்ந்த உள்ளூர் போலீசாரும் வரவழைக்கப்பட்டுள்ளனர்.

இதுகுறித்து இணை போலீஸ் கமிஷனர் லோக் குமார் கூறுகையில், நாங்கள் தொடர்ந்து நடவடிக்கை எடுத்து வருகிறோம், பிரஹம்பூரி, மவுஜ்பூர், சந்த் பாக் மற்றும் பிற பகுதிகளில் போலீசார் நிறுத்தப்பட்டுள்ளனர். எந்தவொரு கூட்டம் வந்தாலும் அதை நாங்கள் கலைக்கிறோம், சமாதானக் குழுக்கள் அமைதியைக் காக்க மக்களுடன் பேச்சுவார்த்தை நடத்தி வருகின்றன என கூறினார். இந்த நிலையில் டெல்லி முதல்வர் அரவிந்த கெஜ்ரிவால் தலைமையில் ஆலோசனை கூட்டம் நடைபெற்றது.

 

இக்கூட்டத்தில் முதல்வர் அரவிந்த கெஜ்ரிவால் பேசுகையில், கூட்டத்தில் எல்லைப் பகுதிகளைச் சேர்ந்த எம்.எல்.ஏ.க்கள் வன்முறையில் ஈடுபடும் மக்கள் வெளியில் இருந்து வருவதாகக் கூறியுள்ளனர். எல்லைகளை முத்திரையிட்டு தடுப்பு கைது நடவடிக்கைகளை மேற்கொள்ள வேண்டியது அவசியமாகும். வடகிழக்கு டெல்லியை சேர்ந்த மக்கள் அமைதிகாக்க டெல்லி முதல்வர் அரவிந்த கெஜ்ரிவால் வேண்டுகோள் விடுத்துள்ளார். பல போலீஸ்காரர்கள் மற்றும் பொதுமக்கள் காயமடைந்து உள்ளனர் மற்றும் சிலர் உயிரிழந்துள்ளனர். பல வீடுகள் தீக்கிரையாக்கப்பட்டன மற்றும் கடைகள் சேதமடைந்தன. இது மிகவும் துரதிர்ஷ்டவசமானது செயலாகும் என அரவிந்த் கெஜ்ரிவால் கூறினார். போலீசார் கடுமையான பற்றாக்குறையாக இருப்பதாகவும் மேலிருந்து உத்தரவுகளைப் பெறும் வரை காவல்துறையினர் நடவடிக்கை எடுக்க முடியாது என்றும் பாதிக்கப்பட்ட பகுதிகளின் எம்.எல்.ஏக்கள் எனக்குத் தெரிவித்து உள்ளனர்.

இந்த பகுதிகளில் போலீசாருடன் சமாதான அணிவகுப்பை மேற்கொள்ளுமாறு மாவட்ட கலெக்டரை கேட்டுக் கொண்டுள்ளேன். காயமடைந்தவர்களுக்கு தரமான மருத்துவ உதவிகளை வழங்குமாறு மருத்துவமனை அதிகாரிகளிடம் கேட்டுக் கொள்ளப்பட்டுள்ளது. காவல்துறையினருடன் ஒருங்கிணைந்து பாதிக்கப்பட்ட பகுதிகளை சரியான நேரத்தில் அடையுமாறு தீயணைப்புத் துறையிடம் கேட்டுக் கொள்ளப்பட்டுள்ளது. வன்முறையால் அனைவரும் பாதிக்கப்படுவார்கள் என்றும் டெல்லிக்கு பெரும் இழப்பு ஏற்படும் என்றும் கெஜ்ரிவால் கருத்து தெரிவித்துள்ளார். கடந்த 2 நாட்களாக டெல்லியில் நிலைமை மிகவும் மோசமாக உள்ளதாகவும் கெஜ்ரிவால் வேதனை தெரிவித்துள்ளார்.

இந்நிலையில் நிலைமையைச் சமாளிப்பது குறித்து விவாதிக்க மத்திய உள்துறை அமைச்சர் அமித்ஷா, ஒரு அவசரக் கூட்டத்துக்கு ஏற்பாடு செய்திருக்கிறார். இதில் கலந்துகொள்ள முதலமைச்சர் அரவிந்த் கெஜ்ரிவால், ஆளுநர் அணில் பஜான் உட்பட பல்வேறு அரசியல் தலைவர்களுக்கும் அழைப்பு விடுக்கப்பட்டுள்ளது. இந்த கூட்டம் 12 மணிக்குத் தொடங்கி நடைபெற்று வந்தது. உள்துறை அமைச்சர் அமித்ஷாவுடனான ஆலோசனைக்குப் பிறகு டெல்லி முதல்வர் கெஜ்ரிவால் செய்தியாளர்களுக்கு பேட்டியளித்துள்ளார். டெல்லி கலவரத்தை ஒடுக்க தேவைப்பட்டால் ராணுவம் அழைக்கப்படும் என டெல்லி முதல்வர் அரவிந்த் கெஜ்ரிவால் கூறியுள்ளார். கலவரம் பாதித்த வட்டாரங்களில் அமைதியை நிலைநாட்ட அரசியல் கட்சிகள் இணைந்து பணியாற்ற முடிவு என்று கெஜ்ரிவால் தெரிவித்துள்ளார். அமித்ஷா நடத்திய ஆலோசனையில் பங்கேற்ற அனைவரும் வன்முறையை முடிவுக்கு கொண்டுவர வலியுறுத்தியதாக அரவிந்த் கெஜ்ரிவால் கூறினார்.