விண்வெளிக்கு பயணம் செய்த முதல் இந்திய விண்வெளி வீராங்கனை கல்பனா சாவ்லாவின் 16வது நினைவு தினம் இன்று கடைப்பிடிக்கப்படுகிறது. ஹரியானா மாநிலம் கர்னலில் கடந்த 1961 ஆம் ஆண்டு, ஜூலை 1ஆம் தேதி பனாரஸ் லால் சாவ்லாவுக்கும், சன்யோகிதா தேவிக்கும் பிறந்த கல்பனா சாவ்லாவுக்கு சுனிதா, தீபா ஆகிய சகோதரிகளும், சஞ்சய் என்ற சகோதரரும் இருந்தனர். கர்னலில் உள்ள அரசு பள்ளியில் உள்ள ஆரம்பக் கல்வியை தொடங்கிய கல்பனா சாவ்லா, பஞ்சாப் பொறியியல் கல்லூரியில் விமான ஊர்தியியல் துறையில் இளங்கலைப் பட்டமும், டெக்சாஸ் பல்கலைக்கழகத்தில் விண்வெளி பொறியியல் துறையில் முதுகலைப் பட்டமும் பெற்றார்.
1986ல் கொலராடோ பல்கலைக்கழகத்தில் இரண்டாவது முதுகலைப் பட்டமும், பிறகு 1988ல் விண்வெளி பொறியியல் துறையில் முனைவர் பட்டமும் பெற்றார். கடந்த 1983ஆம் ஆண்டு ஜீன் பிர்ரே ஹாரிசன் என்ற விமான பயிற்சியாளரை கல்பனா சாவ்லா திருமணம் செய்துக் கொண்டார். 1995 ஆம் ஆண்டு நாசா விண்வெளி வீரர் பயிற்சிக் குழுவில் சேர்ந்த கல்பனா சாவ்லா, கொலம்பிய விண்வெளி ஊர்தியான எஸ்.டி.எஸ்-87-ல் பயணம் செய்வதற்குத் தேர்வு செய்யப்பட்டார். முதல் இந்திய விண்வெளி மங்கையாக 1997-ல் கொலம்பிய விண்வெளி ஊர்தியான எஸ்.டி.எஸ்-87ல் விண்வெளி பயணம் மேற்கொண்டார்.
இந்த பயணத்தில், சுமார் 372 மணி நேரம் விண்வெளியில் இருந்து சாதனைப் புரிந்து வெற்றிகரமாக பூமி திரும்பினார். பின்னர், 2003-ம் ஆண்டு ஜனவரி 16ஆம் தேதி விண்வெளி ஆராய்ச்சிக்காக, அமெரிக்காவின் கென்னடி நிலையத்திலிருந்து கொலம்பியா விண்கலம் எஸ்.டி.எஸ்-107 அனுப்பி வைக்கப்பட்டது. இந்திய வம்சாவளி பெண்ணாகிய கல்பனா சாவ்லா உள்ளிட்ட 7 பேர் பயணித்த விண்கலம், 16 நாள் ஆய்வை முடித்து வெற்றிகரமாக பிப்ரவரி 1-ம் தேதி பூமிக்குத் திரும்பிக் கொண்டிருந்தபோது அமெரிக்காவின் டெக்சாஸ் வான்வெளியில் வெடித்துச் சிதறியது. இதில் கல்பனா சாவ்லா உட்பட 7 விண்வெளி வீரர்களும் பலியாகினர். கல்பனா சாவ்லாவை கௌரவிக்கும் விதமாக நியூயார்க் நகரிலுள்ள ஒரு சாலைக்கு அவருடைய பெயர் வைக்கப்பட்டுள்ளது. வீர மங்கையை இழந்த இந்தியா ஆண்டுதோறும் பிப்ரவரி 1-ம் தேதி கல்பனா சாவ்லாவின் நினைவு தினத்தை கடைப்பிடித்து வருகிறது. கடந்த 2011ஆம் ஆண்டு முதல், ஆண்டுதோறும் வீரதீர சாதனை புரிந்த பெண்களுக்கு கல்பனா சாவ்லா விருது தமிழக அரசு விருது வழங்கி வருவது குறிப்பிடத்தக்கது.
பொருத்தமான வரன்கள் உங்கள் சமூகத்தில், பதிவு இலவசம்! - தமிழ் மேட்ரிமோனி